sábado, 21 de maio de 2022

Lendo a Pere Tobaruela

A semana que vén teremos un novo  "Encontro con escritores/as" organizado pola BBS. Nesta ocasión coñeceremos a Pere Tobaruela, así que levamos unhas semanas lendo algunhas das súas obras. Desta vez cada quen escolleu que obra quería ler, así que algúns leron Vouvos papar e outros/as  Mortos de Ningures. Nas dúas Pere Tobaruela colaborou con outras escritoras na creación dos textos; teremos que preguntarlle, entre outras moitas  cousas,  a súa opinión sobre a escrita colaborativa e sobre a novela de misterio.





Ciberseguridade

Este venres tivemos unha charla sobre ciberseguridade a cargo da Garda Civil. Jorge falounos de grupos de whatsap, chats de xogos, buscas en internet... Todos temas moi interesantes, que nos deron para pensar e falar durante e despois da charla.

Obradoiro de nutrición: despedida

Este venres rematou o obradoiro de nutrición que se desenvolveu no cole desde comezos do 2º trimestre. Rematamos cun xogo no que participamos coa aula de 3º. Eles tiñan que escoller entre diferentes produtos e preparar pratos equilibrados e nós valorar e xustificar a valoración sobre o seu traballo. Foi un bo xeito de repasar o moito que aprendimos nestes meses. 
Grazas, Eloy!

xoves, 19 de maio de 2022

Relevo de interior e de costa

Hoxe presentamos na clase as maquetas de relevo que estivemos realizando nas últimas semanas, como parte das actividades sobre xeografía de España e Galicia. 
Hai un montón de traballo en cada unha das maquetas: escolla de elementos do relevo, deseño, creación, etiquetaxe, exposición... e sobre todo traballo en equipo, reparto de tarefas e responsabilidade. 
As nosas maquetas están desde hoxe na entrada do colexio, para compartir o que aprendemos co resto dos compañeiros/as. 
Bo traballo, Quinto!

mércores, 18 de maio de 2022

Concerto didáctico de jazz

Hoxe puidemos escoitar jazz na nosa escola da man de Alfredo Susavila, Carlos Bastón e Pachi Cruz. Foi un concerto didáctico, no que tocaron diferentes temas, pero tamén nos explicaron como e onde naceu a música jazz e como foi evolucionando, dando lugar a boa parte dos estilos musicais que hoxe escoitamos.
Faláronnos de grandes nomes do jazz como Duke Ellington ou Louise Armstrong, que teñen unha importancia fundamental na música moderna. 
Este concerto didáctico enmárcase nas actividades que se van facer en Rianxo como preparación e ambientación do festival Noites de Jazz, que terá lugar nos primeiros días de agosto. 
Imos aproveitar esta "iniciación ao jazz" que tivemos hoxe no cole para escoitar un pouco máis da música dalgúns dos grandes do jazz dos que nos falou Alfredo. Aquí van dous temas que hoxe soaron no noso cole interpretados por Louis Armstrong e Duke Ellington. 
Preparados para viaxar a Estados Unidos na primeira metade do século XX? Imos alá!
 
 

sábado, 14 de maio de 2022

venres, 13 de maio de 2022

Viaxeiras

Carla, Alejandro e Icía presentáronnos esta semana as súas investigacións sobre tres mulleres viaxeiras, que xa remataran no mes de abril, pero que aínda non compartiran na clase. Fantásticos traballos e presentacións!

Peixes: vexigas natatorias

Este mércores fixemos un experimento para comprender mellor o funcionamento das vexigas natatorias dos peixes. Os nosos peixes foron bolsas con garavanzos e as vexigas natatorias globos. Quedou claro que as vexigas cheas de aire permiten flotar a maior altura, mentres que ao estar baleiras axudan a descender.

sábado, 7 de maio de 2022

Máis ca leña

Comezamos!!!

Este venres fixemos a nosa primeira visita como guías do proxecto Máis ca leña. Recibimos ao alumnado e profesorado do Obradoiro de Emprego de Xestión Forestal de Boiro. Acompañounos tamén Emilio Saborido, para botarnos unha man nesta primeira experiencia e axudar a levar mellor os nervios, que eran moitos 😉

Desta vez participamos toda a clase, repartimos o traballo e colaboramos entre tod@s para que a visita resultara ben. E resultou! 

Agora que comezamos, a tope con Máis ca leña ! 💚💚

Moitas grazas ao Obradoiro de Emprego de Boiro, polo amables e agarimosos que fostes con nós e por facernos tan doada a visita. 

Grazas, Emilio, pola axuda e polo moito que sempre aprendemos contigo 😍

Bo traballo, 5º!!