Na aula de Valores estamos traballando sobre as diferentes estéticas na vestimenta, nos gustos musicais, na maneira de entender o mundo... Coñecer é o primeiro paso para respectar. E niso estamos, coñecendo. O primeiro resultado é un mural que xa preside as escaleiras ao segundo andar. Han vir máis cousas...
Este luns o escritor Anxo Fariña estivo no noso colexio realizando un obradoiro sobre igualdade de xénero. Empregou como base do obradoiro a ilustración e por iso compartiu con nós trucos para debuxar personaxes, técnicas de pintura con témperas visibles na escuridade con raios ultravioletas e boas recomendacións sobre vivir en igualdade cada día.
Ao igual que na cidade violeta, aínda hai moitas desigualdades que descubrir e erradicar da nosa sociedade, non dubidemos en facelas visibles (con ou sen luz ultravioleta) e combatilas.
Conmemoramos no cole o 25 N, todas xuntas, todos xuntos, na biblioteca. Mostramos o noso rexeitamento ao machismo cantando e con carteis que agora presiden a entrada da nosa escola. Vimos o vídeo no que cantamos e ensinamos os carteis, que aínda haberá que completar coas imaxes de hoxe, pero que xa é impresionante, moi fermoso.
En Sociais continuamos traballando sobre Europa. Nestas últimas semanas descubrimos en que consiste a Carta dos Dereitos Fundamentais da Unión Europea, que dereitos temos como cidadáns e cidadás de Europa. En parellas ou tríos lemos un dos apartados da Carta, resumímolo e presentámolo ao resto da clase.
Miguel tróuxonos o xoves pasado un bastón dos empregados por persoas con discapacidade visual e estivo ensinándonos como usalo. O bastón é do seu pai e, como todo o que nos contou Miguel foi moi interesante, decidimos convidar ao seu pai para que nos conte máis cousas sobre o seu traballo e a súa vida. Grazas, Miguel!
Hoxe rematamos as mini mensaxes en Braille e empezamos a intentar ler as mensaxes dos compañeiros e compañeiras. Custou un pouco e iso que eran minis!
En Valores Sociais e Cívicos estamos traballando sobre as linguaxes empregadas por persoas que teñen discapacidade para comunicarse. Comezamos coa linguaxe de signos e seguimos co Braille. Agora estamos probando a producir textos en Braille, escollendo cada quen o método para crear os signos. Moi interesante!
